Raza Musani 
غزہ : صیہونی فوج نے غزہ سٹی میں شدید فضائی اور زمینی حملے کئے ہیں۔ چوبیس گھنٹوں کے دوران غزہ سٹی میں چھیتر اور دیگر علاقوں میں پندرہ فلسطینی شہید اور کئی زخمی کردئے گئے۔
صیہونی فوج کو شدید گولہ باری اور فضائی حملوں کے باوجود غزہ سٹی میں پیشقدمی میں مزاحمت کاسامنا ہے۔ چوبیس گھنٹوں کے دوران صیہونی فوج نے غزہ سٹی میں تیس سے زائد فضائی حملے کئے اور مکانات اور رہائشی عمارتوں کو نشانہ بنایا۔صابرہ کے گنجان آباد علاقے میں ایک مکان پر حملے میں ایک ہی خاندان کے گیارہ افراد شہید ہوئے۔ حمید جنکشن کے قریب حملے میں سات۔ نصیرات کیمپ میں خیمے پر بمباری سے پانچ۔ شمالی غزہ میں بمباری سے چار فلسطینیوں کو شہید کیا گیا۔ خان یونس کے قریب امدادی ٹرکوں کے ساتھ چلنے والی سیکورٹی ٹیم کو نشانہ بنایا گیا جس کے نتیجے میں چار اہلکار شہید اور کئی زخمی ہوگئے۔
شدید حملوں کی وجہ سے لوگوں کو غزہ سٹی سے نکلنے پر شدید مشکلات کا سامنا ہے۔اب تک پانچ لاکھ کے قریب افراد نقل مکانی کرچکے ہیں۔
