ڈاکٹر عبدالقدیر خان کو وہ مقام نہیں ملا جس کے وہ حقدار تھے، پیر محفوظ مشہدی

لاہور : جمعیت علمائے پاکستان (سواد اعظم )کے مرکزی صدر پیر سید محمد محفوظ مشہدی اور سیکریٹری جنرل پیر محمد اقبال شاہ نے مایہ ناز ایٹمی سائنسدان ڈاکٹر عبدالقدیر خان کے انتقال پر اظہار افسوس کرتے ہوئے کہا ہے کہ مرحوم محسن پاکستان تھے۔جن کی محنتوں کی وجہ سے پاکستان ایٹمی قوت بنا۔ ایٹمی قوت ہونے کی وجہ سے پاکستان کے دنیا کے ساتھ باوقار تعلقات قائم ہوئے۔تعزیتی بیان میں پیر محفوظ مشہدی نے ایٹمی سائنسدان کے خلاف پراپیگنڈہ کی مذمت کرتے ہوئے کہا کہ نائن الیون کے بعد جنرل پرویز مشرف نے قوم کوجو نقصان پہنچایا وہ اپنی جگہ شرمناک تھا لیکن ڈاکٹر قدیر خان کو نظر بند رکھنا فوجی آمر کابڑا ظلم اور قومی تضحیک تھی ۔انہوں نے افسوس کا اظہار کیا کہ ڈاکٹر عبدالقدیر خان کو وہ وقار نہیں دیا گیا جس کے وہ مستحق تھے۔ ڈاکٹر قدیر خان نے اپنی زندگی کے آخری ایام میں تنہائی اور نظر بندی میں گزارے۔ اللہ تعالیٰ مرحوم کی مغفرت فرمائے ، قوم اور سوگوار خاندان کو عظیم صدمہ برداشت کرنے کی توفیق عطافرمائے۔