Raza Musani 
واشنگٹن : غزہ میں امداد کی تقسیم کے مقامات پر تشدد اور قتل میں ملوث امریکا کی نجی ملٹری فرم نے ازسرنو تعیناتی کے لیے سابق فوجیوں کو بھرتی کرنا شروع کردیا ہے۔
امریکی فرم یوجی سلوشن کو بدنام زمانہ غزہ ہیومینٹیرین فاؤنڈیشن کے امدادی مراکز پر سیکورٹی کیلئے رکھا گیا تھا جس نے کھلے عام فلسطینیوں کا قتل عام کیا۔ ڈراپ سائٹ کے مطابق یہ فرم مضبوط سیکورٹی کردار کیلئے اپنی استعداد بڑھارہی ہے۔
رپورٹ کے مطابق کمپنی مبینہ طور پر صدر ڈونلڈ ٹرمپ کی تجویز کے تحت 15 نئے امدادی مراکز کھولنے کا ارادہ رکھتی ہے جس میں ایک بین الاقوامی استحکام فورس بھی شامل ہے۔ ایک امریکی فوجی عہدیدار نے بتایا کہ فرم کا مقصد دسمبر تک بھرتی کرنے والوں کو تعینات کرنا ہے۔
بھرتی کئے گئے اہلکاروں کے معاہدوں سے واضح ہوتاہے کہ مسلح گارڈ ڈیوٹی کے لیے یومیہ ایک ہزار ڈالر تک پیشکش کی جارہی ہے۔ رپورٹ کے مطابق یہ فورس اقوام متحدہ کی کمان کے تحت نہیں ہوگی بلکہ اس کے بجائے صدر ٹرمپ کی سربراہی میں بورڈ آف پیس کو رپورٹ کرے گی۔ اس بورڈ کو غزہ کی سیکورٹی، تعمیر نو اور انسانی بنیادوں پر کام کرنے کا اختیار دیا گیا ہے۔
