Raza Musani 
تہران : سپاہ پاسداران انقلاب کے سربراہ جنرل سلامی نے کہا ہے کہ دشمن بہتر جانتے ہیں کہ ہم کاری وار کرنے کی صلاحیت رکھتے ہیں، کسی قسم کی غلطی کی صورت میں دردناک جواب دیا جائے گا۔ میجر جنرل حسین سلامی نے جنرل عباس نیلفروشان کی شہادت کو اصفہان کے لئے ایک افتخار قرار دیا ہے۔ ان کی شہادت سے اصفہان کی تاریخ میں ایک روشن باب کا اضافہ ہوا ہے۔ انہوں نے کہا کہ وعدہ صادق 2 آپریشن میں ہماری طاقت کی جھلک دکھائی گئی ہے۔ ہم نے یہ آپریشن کرکے واضح کردیا کہ ہم اپنی سرزمین اور اپنے ہم وطنوں پر حملے کا انتقام لے کر رہیں گے۔ اس حوالے سے کسی قسم کا سمجھوتہ نہیں کریں گے۔ دشمن اپنے دفاعی سسٹم پر اعتماد نہ کریں کیونکہ ہم ان سے آسانی سے عبور کرسکتے ہیں۔ آج بھی دشمن کو یہی پیغام دیتے ہیں کہ کسی قسم کی غلطی کرنے میں احتیاط سے کام لیں ورنہ ہم دردناک جواب دیں گے۔ انہوں نے کہا کہ امریکہ سے جدید دفاعی نظام خرید کر صہیونی حکومت اپنی حفاظت کرنا چاہتی ہے۔ یہ میزائل کے خول تمہیں نہیں بچاسکیں گے۔ ہم دشمن پر کاری وار کرنے کی صلاحیت رکھتے ہیں۔
