Raza Musani 
مناما :بحرین کے ممتاز عالم اور انقلابی تحریک کے سربراہ آیت اللہ شیخ عیسیٰ قاسم نے آئندہ پارلیمانی انتخابات کو مسترد کرتے ہوئے اسے قوم کیلئے نئی آفت اور تباہی قرار دیا ہے، ایک بیان میں شیخ عیسیٰ قاسم نےکہا ہے کہ یہ انتخابات آل خلیفہ خاندان کے رجعتی اور جابرانہ اقدامات کو تقویت دیں گے اور بحرینی عوام کے مفادات کو خطرے میں ڈالیں گے۔
آیت اللہ شیخ عیسی قاسم نے کہا ہے کہ نومبر میں ہونے والے انتخابات بحرینی قوم کے مصائب میں اضافہ اور حکمرانوں کی آمریت کو مضبوط کریں گے ۔ شریعت پر یقین رکھنے والوں کو اس غیر منصفانہ انتخابات کے سامنے خاموش نہیں رہنا چاہیے، جس کا مقصد ان کی مرضی کے خلاف قوم کی تقدیر کا تعین کرنا اور ان کے مفادات کو مزید پسماندہ اور پامال کرنا ہے۔ انہوں نے مزید کہا کہ وہ تمام لوگ جو عدل و انصاف پر یقین رکھتے ہیں اور محب وطن ہیں۔ اس جعلی الیکشن کے خلاف اُٹھ کھڑے ہوں کہ جس میں لوگوں کی منشاء کو مدنظر نہیں رکھا گیا اور اگر یہ الیکشن ان کی خواہش کے خلاف ہوا ہے تو اس سے دوری اختیار کریں، اگر حکومت ملک اور عوام کی خیر خواہ ہے تو اسے صاف اور شفاف الیکشن کروانے چاہئیں نہ کہ دھاندلی زدہ۔ انہوں ںے کہا کہ قوم کو کسی کو یہ جھوٹا دعویٰ کرنے کا موقع نہیں دینا چاہیے کہ غیر منصفانہ انتخابات میں ٹرن آؤٹ زیادہ ہوگا، کیونکہ ایسا نہ کرنے سے خوفناک ناانصافی ہوگی۔
