انصار اللہ کا اسرائیل پر بیلسٹک میزائل اور ڈرونز سے حملہ

صنعا : یمن کی انصار اللہ بھی غزہ کی جنگ میں کود پڑی۔ یمن کی قومی سالویشن حکومت کے وزیر اعظم نے کہا کہ غزہ میں نسل کشی کے جواب میں اسرائیل کے شہر ایلات پر بیلسٹک میزائل اور ڈرونز سے حملہ کیا ہے اور خبردار کیا کہ مزید حملے کئے جائیں گے۔ فورسز کے ترجمان بریگیڈیئر جنرل یحییٰ ساری نے ایک بیان میں کہا کہ یمنی فوج نے مقبوضہ علاقوں میں مختلف اہداف پر بیلسٹک میزائلوں اور بڑی تعداد میں ڈرونز سے حملوں کا آغاز کردیا۔ فلسطین میں ہمارے مظلوم بھائیوں کی حمایت میں یہ تیسرا آپریشن ہے۔ 25 ویں دن بھی دنیا دیکھ رہی ہے کہ مقبوضہ فلسطین میں کیا ہو رہا ہے اور غزہ کی پٹی میں کیا ہو رہا ہے۔ وحشیانہ اسرائیلی- امریکی جارحیت، روزانہ قتل عام، نسل کشی، مکمل تباہی دنیا دیکھ رہی ہے۔ ترجمان نے فلسطینی عوام کے اپنے دفاع کے حق پر زور دیا اور کہا کہ اسرائیلی قبضہ خطے کو غیر مستحکم کرنے اور تشدد کو ہوا دینے والا ہے۔