Raza Musani 
تل ابیب : ایران میں حالیہ ہنگاموں اور فسادات کی ماسٹر مائنڈ یہودی خاتون نکلی۔ اسرائیل کے عبری زبان کے اخبار معاریو نے ہنگاموں اور فسادات میں ملوث یہودی خاتون سرغنہ الہام یعقوبیان کا نام فاش کیا ہے۔ رپورٹ کے مطابق خاتون ایرانی نژاد امریکی شہری ہے اور کئی برس سے اسرائیلی جاسوسی ادارے موساد اور امریکی جاسوسی ادارے سی آئی اے کے ساتھ ایران میں موجود دہشت گرد عناصر کے ساتھ رابطہ کاری کا کام کر رہی ہے۔اس نے بدامنی، تخریب کاری، بلوا اور فساد ایجاد کرنے کی خصوصی ٹریننگ حاصل کر رکھی ہے اور حالیہ ہنگاموں اور فسادات کیلئے کافی عرصے سے ایران میں خصوصی ٹیمیں تشکیل دے رکھی تھیں۔ کچھ دن قبل جب امریکا کے شہر لاس اینجلس میں ایران مخالف مظاہروں کی تصاویر سوشل میڈیا پر شائع ہوئیں تو ان میں الہام یعقوبیان کی تصویر بھی دیکھی گئی تھی۔ اس نے کچھ دن پہلے عبری نئے سال کے بہانے سے اپنے فیس بک اکاونٹ پر ایرانی شہریوں کیلئے پیغام بھیجا اور انہیں ہنگاموں اور فسادات پر اکسایا۔ انہی دنوں اسرائیل کی غاصب صہیونی فورسز مسجد اقصیٰ کی بے حرمتی کرنے میں مصروف تھیں اور بیگناہ فلسطینی جوانوں اور مسجد اقصیٰ میں نمازیوں کے خلاف تشدد سے پیش آنے کے علاوہ انہیں گرفتار بھی کر رہی تھیں، لیکن الہام یعقوبیان نے اپنے پیغام میں ان کا ذکر تک نہیں کیا۔
