امریکا افغانستان کے امور میں مداخلت سے باز رہے، طالبان

کابل :طالبان حکومت نے ایک بارپھر امریکا کو افغانستان کے امور میں مداخلت پر خبردار کیا ہے۔ طالبان انتظامیہ کے ترجمان ذبیح اللہ مجاہد نے ٹوئٹ کیا کہ طالبان نے دوحہ سمجھوتے پر عمل کیا ہے اور وہ کسی کو بھی افغان سرزمین کسی ملک کے خلاف استعمال کرنے کی اجازت نہیں دیں گے۔ انہوں نے کہا کہ افغانستان میں مرد و خواتین سب محفوظ ہیں اور اقلیتوں کے حقوق کا بھی احترام کیا جاتا ہے۔ ادھر
طالبان کے وزیر برائے امربالمعروف و نہی عن المنکر محمد خالد حنفی نے کہا ہے کہ اسلامی نظام نافذ کرنے کے لئے مزید احکامات جاری کئے جائیں گے۔اسلامی نظام کی بقا میں ان کی وزارت کا اہم کردار ہے جس سے ہرگز پیچھے ہٹا نہیں جائے گا۔ ہم افغانستان میں اسلامی نظام کے نفاذ کے لئے پرعزم ہوچکے ہیں اور اسی رو سے ہر حال میں تمام فیصلوں اور احکامات کو عملی جامہ پہنایا جائے گا۔ انہوں نے کہا کہ مزید احکامات بھی تیار کئے جا رہے ہیں۔