امریکا نے حماس سے براہ راست رابطے کا فیصلہ کرلیا

واشنگٹن : امریکا نے غزہ میں جنگ بندی کے دوسرے مرحلے پر مکالمے کیلئے حماس سے براہ راست رابطے کا فیصلہ کرلیا۔امریکی اخبار نیو یارک ٹائمز کے مطابق امریکا کے خصوصی ایلچی اسٹیو وٹکوف حماس کے مذاکرات کار خلیل الحیا سے ملاقات کی تیاری کررہے ہیں۔ وٹکوف اور الحیا کے درمیان ملاقات کی تاریخ ابھی طے نہیں ہوئی اور شیڈول میں تبدیلی کا امکان موجود ہے۔ رپورٹ کے مطابق ملاقات واشنگٹن کے لیے غیر معمولی قدم ہوگی کیونکہ امریکہ رسمی طور پر حماس کے ساتھ رابطہ نہیں کرتا۔ امریکی انتظامیہ نیو غزہ منصوبے کی حمایت کر رہی ہے، جو صرف اسرائیل کے زیر کنٹرول علاقے میں تعمیر نو اور سرمایہ کاری کو یقینی بنائے گا۔ جس پر فلسطینی مزاحمتی گروپ تحفظات کا اظہار کررہے ہیں اور انہیں فلسطینی اداروں کو نظرانداز کرنے اور حقیقی خودمختاری کی راہ مؤخر ہونے کا خدشہ ہے۔