ملک بھر میں شہدائے کربلا کے چہلم پر جلوس برآمد، عزاداروں کی بھرپور شرکت

کراچی: ملک بھر میں نواسہ رسول(ص) حضرت امام حسین علیہ السلام کا چہلم آج مذہبی عقیدت و احترام سے منایا جا رہا ہے۔ اس سلسلے میں لاہور، کراچی ، اسلام آباد، پشاور، کوئٹہ، گلگت بلتستان سمیت چھوٹے بڑے شہروں میں روایتی جلوس برآمد کیے جارہے ہیں، اس دوران قانون نافذ کرنے والے اداروں کی جانب سے سیکیورٹی ہائی الرٹ ہے۔
کراچی میں چہلم حضرت امام حسین علیہ السلام کامرکزی جلوس نشترپارک سے برآمد ہوا جو روایتی راستوں سے گزرتا ہوا امام بارگاہ حسینیہ ایرانیان پر اختتام پذیر ہوگا۔
جلوس کی گزرگاہوں کو کنٹینرز لگا کر سیل کر دیا گیا ہے، جلوس کی سیکیورٹی پر 6 ہزار سے زائد پولیس اہلکار تعینات ہونگے اور ان کے ساتھ رینجرز کے اہلکار بھی تعینات ہوں گے، اس کے علاوہ سی سی ٹی وی کی مدد سے جلوس کی سخت نگرانی کی جائیگی۔ دوسری جانب چہلم حضرت امام حسین علیہ السلام کے موقع پر شہر بھر میں دفعہ 144 نافذ کر دی گئی ہے، محکمہ داخلہ سندھ کے جاری کردہ نوٹیفکیشن کے مطابق جلوس کے دوران ہیلی کیم اڑانے پر پابندی ہوگی۔
لاہور میں چہلم حضرت امام حسین علیہ السلام کا مرکزی جلوس حویلی الف شاہ سے برآمد ہوگیا جو مرکزی راستوں سے ہوتا ہوا گامے شاہ پر اختتام پذیر ہوگا۔
چہلم حضرت امام حسین کے حوالے سے لاہور پولیس نے سیکیورٹی پلان تیار کر لیا، ڈی آئی جی آپریشنز علی رضوی کے مطابق مرکزی جلوس پر چار ہزار سے زائد پولیس افسران و اہلکار ڈیوٹی کے فرائض سرانجام دینگے، پولیس جوانوں کے ساتھ رضاکار بھی چیکنگ کے فرائض سرانجام دیں گے۔
مرکزی عزاداری جلوس کو تین درجاتی حفاظتی حصار پر مبنی سکیورٹی فراہم کی جائے گی، چیکنگ کے لئے میٹل ڈیٹیکٹرز اور واک تھرو گیٹس کا استعمال یقینی بنایا جائے گا جبکہ خواتین کی چیکنگ کیلئے 193 لیڈیز پولیس اہلکار بھی تعینات ہونگی۔
ڈی آئی جی آپریشنز علی رضوی نے کہا کہ امام بارگاہ اور عزاداری جلوس کے روٹ میں آنے والی عمارتوں کی چھتوں پر سنائپرز تعینات ہونگے، مرکزی عزاداری جلوس کی سی سی ٹی وی کیمروں کے ذریعے مانیٹرنگ کی جائے گی، مرکزی جلوس کے روٹ اور اطراف پر ڈبل سواری اور ڈرون اڑانے پر پابندی ہوگی۔