پاکستان ہرگز اسرائیل کو تسلیم نہیں کرے گا: وزارت خارجہ

پاکستان قطعی طور پر فلسطینی عوام کے جائز حق خود ارادیت کی حمایت کرتا ہے
اسلام آباد (نیوز ڈیسک)پاکستان نے قدس کی غاصب اور جابر صیہونی حکومت کو تسلیم کرنے کی قیاس آرائیوں کو یکسر مسترد کر دیا ، وزارت خارجہ کے ترجمان زاہد حفیظ چودھری نے ایک بیان میں فلسطینی مسلمانوں کی حمایت کے حوالے سے پاکستان کے اصولی موقف پر تاکید کرتے ہوئے کہا کہ ایک ایسی حکومت کے ساتھ جس نے فلسطین کی سرزمین پر قبضہ کیا ہوا ہے روابط کی برقراری کا موضوع ہمارے ایجنڈے میں شامل نہیں ، اسرائیل کو تسلیم کرنے کے حوالے سے وزیراعظم عمران خان کے بیانات واضح اور غیر متزلزل ہیں ، عمران خان واضح کر چکے ہیں کہ مسئلہ فلسطین کے منصفانہ اور فلسطینیوں کے لیے قابل قبول حل تک پاکستان اسرائیل کو تسلیم نہیں کرسکتا ، پاکستان قطعی طور پر فلسطینی عوام کے جائز حق خود ارادیت کی حمایت کرتا ہے۔