آرمی پبلک اسکول پشاور کے سانحے کی یاد میں پاراچنار میں شہداء کی قبروں پر دعائیہ تقریب منعقد ہوئی، جس میں شہداء کے لواحقین نے بھی شرکت کی۔ پاراچنار کے گلزار شہداء قبرستان میں آرمی پبلک اسکول پشاور سانحے میں شہید ہونے والے پاراچنار کے طلباء شہید ندیم حسین، شہید عمران علی اور شہید ابرار حسین کی قبروں پر دعائیہ تقریب منعقد ہوئی اور شہداء کے درجات کی بلندی کیلئے فاتحہ خوانی کی گئی۔ شہداء کی قبروں پر شمعیں بھی روشن کی گئیں۔ اس موقع پر خطاب کرتے ہوئے شہید ابرار حسین کے بھائی منتظر حسین، یوسف لالا، حاجی عابد حسین، علامہ یوسف حسین اور سر زاہد حسین نے کہا کہ دہشت گردی کا یہ بدترین واقعہ ہم کبھی بھی نہیں بھولیں گے اور دہشت گردی کے خلاف ہم فورسز کے ساتھ ہیں۔
شہداء کے لواحقین نے کہا کہ انہیں اپنے ننھے پھولوں کی قربانی پر فخر ہے، لواحقین اور رہنماؤں نے حکومت سے مطالبہ کیا کہ اے پی ایس کے شہداء کے ورثاء کے ساتھ کیے گئے وعدے پورے کریں۔ سانحہ اے پی ایس پشاور کے شہداء کی یاد میں ضلع کرم کے مختلف اسکولوں میں بھی تقریبات کا انعقاد کیا گیا، جس میں اسکولوں کے ننھے طالب علموں نے شہدائے اے پی ایس کو خراج تحسین پیش کیا اور اس عہد کا اظہار کیا کہ وہ تعلیم حاصل کرکے ہی دشمن سے انتقام لیں گے۔
