وزیراعظم عمران خان نے آئمہ مساجد اور خطیبوں کو ماہانہ اعزازیہ دینے کی تجویز منظور کرلی ہے۔ نجی ٹی وی کی رپورٹ کے مطابق وفاقی وزیر مذہبی امور پیر نورالحق قادری نے آئمہ مساجد اور خطیبوں کو ماہانہ 10 ہزار روپے دینے کی تجویز دی تھی، جسے وزیراعظم نے منظور کرلیا ہے اور اس حوالے سے انہوں نے وزیر مذہبی امور کو تجویز پر حتمی کام کرنے کی ہدایت کر دی ہے۔ ذرائع کے مطابق پنجاب، خیبر پختونخوا اور اسلام آباد کے آئمہ مساجد اور خطیبوں کو اعزازیہ ملے گا اور وزارت مذہبی امور جلد اعزازیہ سے متعلق سروے کرے گی۔ ذرائع کا کہنا ہے کہ اعزازیے کیلئے اہلیت، مالیاتی تخمینے سمیت دیگر امور پر حتمی تجاویز طلب کر لی گئی ہیں جبکہ پنجاب، کے پی اور اسلام آباد کے بعد بلوچستان کے آئمہ مساجد اور خطیبوں کو اعزازیہ ملے گا۔
