بحرین اسرائیل تعلقات،صہیونی حکومت سے معاہدہ فلسطینی عوام سے غداری ہے( مزاحمتی تنظیمیں)

 بحرینی حکمرانوں نے در اصل فلسطینی قوم کی پیٹھ پر خنجر گھونپا ہے،حزب اللہ، مقصد سینچری ڈیل کو عملی جامہ پہنانا اور فلسطینی کاز کو ختم کر دینا ہے،حماس
بحرین کی حکومت پوری طرح سے امریکا کی پٹھو ہے،جہاد اسلامی ،اسرائیل سے تعلقات قائم کرنیوالوں کو بھاری قیمت چکانی پڑے گی،انصار اللہ
بیروت (نیوز ڈیسک) مزاحمتی تنظیموں نے بحرین کے صہیونی حکومت سے معاہدے کو فلسطینی عوام سے غداری قرار دیا ہے، حزب اللہ نے ایک بیان میں کہا کہ آل خلیفہ حکومت نے علاقے میں آلہ کار حکومتوں کی بدلتی ہوئی پالیسی کے دائرے میں غاصب اور دشمن صہیونی حکومت کے ساتھ روابط برقرار کئے ، غاصب اسرائیل کے ساتھ روابط برقرار کرنے والے حکمرانوں نے در اصل فلسطینی قوم کی پیٹھ پر خنجر گھونپا ہے۔ تاہم آزاد منش قومیں اور مزاحمتی تحریکیں عرب امارات اور بحرین کی خیانت کا دندان شکن جواب دیں گی، حماس نے کہاکہ یہ قدم سینچری ڈیل کو عملی جامہ پہنانے کی ایک کڑی ہے جس کا مقصد فلسطینی کاز کو ختم کر دینا ہے، جہاد اسلامی تنظیم نے کہا ہے کہ اب یہ بات پوری طرح واضح ہوگئی ہے کہ بحرین کی حکومت پوری طرح سے امریکا کی پٹھو ہے، ا ±دھر یمن کی عوامی تحریک انصاراللہ نے کہا کہ جو حکومتیں غاصب صہیونی حکومت سے روابط قائم کر رہی ہیں وہ اپنے عوام کی نمائندگی نہیں کرتیں اور انہیں اس کی بھاری قیمت چکانی پڑے گی، فلسطینی انتظامیہ کے سربراہ محمود عباس نے منامہ سے اپنے سفیر کو واپس بلا لیا ہے