امریکی وزیر خارجہ کا دورہ سعودی عرب، ولی عہد سمیت دیگر عہدیداران سے ملاقاتیں

ریاض : غزہ میں ظلم اور بمباری کے لئے اسرائیل کو بھرپور تعاون اور مدد فراہم کرنے والے امریکی وزیر خارجہ دورہ اسرائیل کے بعد خلیجی ممالک کے دورہ پر ہیں۔
اپنے دورہ سعودی عرب کے دوران امریکی وزیر خارجہ انٹونی بلنکن نے سعودی ولی عہد سے ملاقات کی۔ ملاقات میں سعودی ولی عہد شہزادہ محمد بن سلمان نے غزہ میں عسکری کارروائیاں فوری طور پر روکنے کا مطالبہ کیا۔ ولی عہد نے کشیدگی ختم کرنے اور غزہ سے حصار اٹھانے پر زور دیا ہے۔ ولی عہد شہزادہ محمد بن سلمان نے امریکی وزیر خارجہ انٹونی بلنکن سے ملاقات میں کہا کہ غزہ میں عالمی انسانی حقوق کا احترام کرتے ہوئے خطے کی سلامتی اور امن کو قائم رکھنے کے لیے اقدامات کیے جائیں۔ دائمی امن کے قیام کے لیے ضروری ہے کہ فلسطینی عوام کو ان کے جائز حقوق دیئے جائیں۔ ملاقات کے دوران امریکہ میں سعودی سفیر شہزادی ریما بنت بندر اور وزیر خارجہ شہزادہ فیصل بن فرحان بھی موجود تھے۔