Raza Musani 
واشنگٹن : امریکی صدر جوبائیڈن نے پاکستان کو خطرناک ترین ممالک میں قرار دے دیا۔ ڈیموکریٹک کانگریشنل کمپین کمیٹی سے خطاب میں امریکی صدر جوبائیڈن تمام احسانات بھول بیٹھے۔چین کے کردار پر بات کرتے کرتے پاکستان کو بھی نہیں چھوڑا اور الزامات کی برسات کردی۔جوبائیڈن نے الزام لگاتے ہوئے کہا ہے کہ پاکستان کا ایٹمی پروگرام بے قاعدہ ہے۔اس میں کوئی ضابطگی اور ہم آہنگی نہیں ہے۔ میراخیال ہے کہ پاکستان خطرناک ترین ممالک میں سےایک ہے۔ جوبائیڈن نے کہاکہ ہم ایسی صورتحال سے دوچار ہیں جہاں چین، روس، بھارت اور پاکستان کے حوالے سے اپنا کردار جاننے کی کوشش کر رہے ہیں۔ دنیا تیزی سے بدل رہی ہے۔ یہ قابو سے باہر ہے لیکن یہ کسی ایک فرد یا ایک قوم کی وجہ سے نہیں ہے۔ کیا آپ نے کبھی سوچا تھا کہ کوئی روسی رہنما ایٹمی ہتھیار استعمال کرنےکی دھمکی دے گا۔ امریکی صدر کا مزید کہنا تھا کہ چینی صدر کو معلوم ہے کہ انہیں کیا چاہیے لیکن ان کے ساتھ بے شمار مسائل ہیں۔ روس میں کیا ہورہا ہے اور دنیا کے خطرناک جوہری ممالک میں سے ایک پاکستان میں کیا ہورہا ہے اور امریکا کو کس طرح اس سب کو دیکھنا اور ہینڈل کرنا ہے یہ اہم ہے۔انہوں نے مزید کہا کہ بہت کچھ ہورہا ہے لیکن اس میں امریکا کے لیے مواقع بھی ہیں کہ وہ صورتحال کو تبدیل کرسکے۔
