تیل پیداوار میں کمی سے امریکی صدر مایوس، سعودی عرب سے تعلقات کا ازسرنو جائزہ

واشنگٹن : اوپیک پلس کے تیل کی پیداوار میں کمی کے فیصلے نے امریکی صدر جوبائیڈن کی امیدوں پر پانی پھیر دیا اور وہ اس فیصلے سے مایوس ہوگئے۔ وائٹ ہاؤس کی قومی سلامتی کے ترجمان جان کربی نے کہا کہ تیل کی پیداوار میں کمی کے بعد سعودی عرب سے تعلقات کا از سر نو جائزہ لیا جارہا ہے۔ انہوں نے کہا کہ میرے خیال میں صدر بائیڈن بالکل واضح ہیں کہ سعودی عرب کے ساتھ ایک ایسا رشتہ ہے جس کا ہمیں دوبارہ جائزہ لینے کی ضرورت ہے۔ ہمیں تمام معاملات کو ازسر نو دیکھنے کی ضرورت ہے اور یقینی طور پر اوپیک پلس کے فیصلے کی روشنی میں صدر بائیڈن بھی یہی سوچ رہے ہیں۔ ترجمان نے مزید کہا کہ بائیڈن، سعودی امریکا تعلقات کے مستقبل پر کانگریس کے ساتھ مل کر کام کرنے کے خواہشمند ہیں۔ جوبائیڈن اوپیک پلس کے فیصلے سے مایوس ہیں اور وہ کانگریس کے ساتھ کام کرنے کو تیار ہیں کہ سعودی عرب کے ساتھ مستقبل میں کیسے تعلقات میں پیشرفت ہونا چاہئے۔