انروا کا حماس سے کوئی تعلق نہیں، امریکی الزام گمراہ کن قرار

جنیوا : اقوام متحدہ نے امریکی وزیر خارجہ مارکو روبیو کے انروا کو حماس کا ذیلی ادارہ قرار دینے کے الزام کو بے بنیاد اور گمراہ کن قرار دے کر مسترد کر دیا۔۔ اقوام متحدہ کے ترجمان فرحان حق نے نیویارک میں صحافیوں سے گفتگو میں کہا کہ انروا کا حماس سے کوئی تعلق نہیں ہے، بلکہ وہ غزہ میں انسانی امداد کے سب سے بڑے کام کی ریڑھ کی ہڈی ہے۔ انہوں نے کہا کہ امریکی وزیرِ خارجہ مارکو روبیو کے بیانات حقائق کے منافی ہیں۔ ترجمان نے وضاحت کی کہ انروا کے صرف چند اہلکاروں کے بارے میں قابلِ اعتبار شواہد سامنے آئے تھے جنہیں فوری طور پر برطرف کردیا گیا جبکہ باقی کے خلاف لگائے گئے الزامات کی کوئی بنیاد ثابت نہیں ہوئی۔ فرحان حق نے زور دیا کہ انروا غزہ میں لاکھوں متاثرین کی زندگی بچانے میں مرکزی کردار ادا کررہی ہے۔ عالمی برادری کو بے بنیاد الزامات کے ذریعے اس پر حملے کی کوششوں کے بجائے اس کی حمایت کرنی چاہیے۔۔