خطے میں امریکی مفادات مزاحمت کاروں کے نشانے پر، فوجی اڈوں پر حملے

صنعا: غزہ پر حملے کے بعد خطےمیں امریکی مفادات مزاحمت کاروں کے نشانے پر آگئے۔ یمن سے انصاراللہ نے امریکی بحری جہاز پر میزائل سے حملہ کردیا۔ امریکی وزارت دفاع پینٹاگون نے دعویٰ کیا ہے کہ میزائلوں کا نشانہ اسرائیل تھا۔ امریکی نیوی نے یمن سے داغے گئے تین کروز میزائل اور متعدد ڈرونز کو مار گرایا ہے۔ ادھر عراق کے مغربی صوبے الانبار میں واقع امریکی فوجی اڈے عین الاسد پر میزائلوں سے حملہ کیا گیا۔ فوجی اڈے میں یکے بعد دیگرے بڑے دھماکے سنے گئے۔ حملے کے بعد فضا میں امریکی طیارے اور ہیلی کاپٹرز گشت کرنے لگے۔ عراقی مقاومتی تنظیم نے دعویٰ کیا ہے کہ تمام میزائل اپنے ہدف پر لگنے میں کامیاب ہوگئے ہیں۔ دوسری جانب شام کے صوبے دیرالزور میں دو الگ الگ میزائل حملوں میں العمر آئل فیلڈ اور کونوکو گیس فیلڈ سے منسلک گیس لائن کو نشانہ بنایا گیا۔ دھماکے سے گیس فیلڈ میں آگ بھڑک اٹھی۔ عراقی مقاومتی تنظیموں نے گیس فیلڈ کونیکو میں تعیینات امریکی فورسز پر حملے کی ذمہ داری قبول کی ہے۔