Raza Musani 
نئی دہلی: ہندوستان کے صوبے ہریانہ کے ضلع نوح میں دو مساجد کو آگ لگادی گئی۔ نوح کے علاقے وجئے چوک اور پولیس اسٹیشن کے قریب واقع مساجد میں رات گئے آگ بھڑک اٹھی۔ آگ سے مساجد کو معمولی نقصان پہنچا۔ تاہم کوئی زخمی نہیں ہوا۔ پولیس کا کہنا ہے کہ ایک مسجد کو آگ لگائی گئی جبکہ دوسری مسجد میں آگ لگنے کی وجہ شارٹ سرکٹ معلوم ہوتا ہے۔ ایک دو دن قبل بھی دونوں مساجد پر پٹرول بموں سے حملہ کیا گیا تھا۔ ادھر ہندوتوا شرپسندوں کی دھمکیوں کی وجہ سے مسلم خاندانوں نے گروگرام سے نقل مکانی شروع کردی اور کئی خاندان علاقہ چھوڑ کر جاچکے ہیں۔ علاقہ مکینوں کا کہنا ہے کہ ہندوتوا شرپسند کھلے عام مسلمانوں کو علاقہ چھوڑنے کے اعلانات کرتے پھر رہے ہیں لیکن ان کے خلاف کوئی کارروائی نہیں کی جارہی ہے۔ پولیس نے اب تک نوح اور گروگرام اضلاع میں فسادات کے سلسلہ میں 44 ایف آئی آر درج کی ہیں اور 139 لوگوں کو گرفتار کیا ہے۔ ادھر اجتماعات پر پابندی کی وجہ سے ہریانہ کے شہر گروگرام میں نماز جمعہ نہیں ہوسکے گی۔ مسلمانوں نے گھروں میں ہی نماز ادا کرنے کے فیصلہ کیا ہے۔
