Raza Musani 
انقرہ : ترک وزیر خارجہ ہاکان فیدان کا کہنا ہے کہ اگر اسرائیل 1967 کی سرحدوں پر مبنی فلسطینی ریاست کو تسلیم کر لے تو وہ مستقبل میں مجوزہ علاقائی سیکیورٹی پلیٹ فارم کا حصہ بن سکتا ہے۔ ترک وزیر خارجہ ہاکان فیدان نے ایک انٹرویو میں پاکستان، ترکیہ، سعودی عرب، مصر اور خلیجی ممالک پر مشتمل نئے علاقائی سیکیورٹی فریم ورک کی تجویز پیش کی ہے۔ انہوں نے کہا کہ خطے کے ممالک کو ایک دوسرے کی خودمختاری اور سلامتی کے تحفظ کے لیے مشترکہ نظام تشکیل دینا چاہیے۔ انہوں نے کہا کہ مستقبل میں ایران بھی اس پلیٹ فارم کا حصہ بن سکتا ہے جب خطے میں حالات معمول پر آ جائیں۔ فیدان کے مطابق اسرائیل کی شمولیت اس شرط سے مشروط ہوگی کہ وہ 1967 کی سرحدوں پر مبنی آزاد فلسطینی ریاست کو تسلیم کرے۔انہوں نےکہاکہ فلسطین کا مسئلہ حل ہونے کی صورت میں علاقائی ممالک اسرائیل کی سلامتی میں بھی کردار ادا کر سکتے ہیں۔ ان کا کہنا تھا کہ ترکیہ دو ریاستی حل کی حمایت کرتا ہے اور خطے میں پائیدار امن کے لیے فلسطینی ریاست کا قیام ناگزیر ہے۔
