چیلنجز اور بحرانوں سے نمٹنے کے لیے مشترکہ لائحہ عمل بنانا ہوگا، عرب لیگ

الجزیرہ : عرب لیگ نے درپیش چیلنجوں اور بحرانوں سے نمٹنے کے لیے مشترکہ لائحہ عمل کی اہمیت پرزوردیا ہے۔ عرب لیگ کا تین سال کے وقفے کے بعد پہلا سالانہ سربراہ اجلاس الجزائر میں ہوا۔ جس میں عرب دنیا کو درپیش چیلنجز اور بحرانوں پر غور کیا گیا اور اس سے نمٹنے کیلئے لیے مشترکہ لائحہ عمل بنانے پر اتفاق کیا گیا۔ رکن ممالک نے داخلی معاملات میں غیر ملکی مداخلت کو مسترد کرنے کا اعادہ بھی کیا ہے۔ سعودی وزیرخارجہ شہزادہ فیصل بن فرحان نے خبردار کیا کہ جغرافیائی سیاسی تنازعات سے دنیا کو درپیش چیلنجز کا مقابلہ کرنے کی صلاحیت کو نقصان پہنچنے کا اندیشہ ہے۔ مصر کے صدرعبدالفتاح السیسی نے کہاکہ بین الاقوامی اورعلاقائی طاقتوں کی طرف سے عرب دنیا میں اثرو رسوخ کے زون قائم کرنے کی کوشش کو ناکام بنایا جائے۔ فلسطینی صدر محمود عباس نے اسرائیلی جرائم کی تحقیقات کے لیے عرب قانونی کمیٹی کے قیام کا مطالبہ کیا۔ اردن کے ولی عہد نے کہاکہ ہمیں تجارت، سرمایہ کاری، صنعت، سیاحت اور زراعت کے شعبوں میں امید افزا صلاحیتوں سے فائدہ اٹھانا ہوگا۔