صیہونی ریاست پر غزہ جنگ بندی کے معاملے پر بالکل بھروسہ نہیں، ایرانی وزیرخارجہ

تہران : ایران کے وزیرِ خارجہ عباس عراقچی نے کہا ہے کہ ایران غزہ میں اسرائیلی نسل کشی کے خاتمے کا خیر مقدم کرتا ہے لیکن ماضی میں اسرائیلی وعدہ خلافیوں کے باعث محتاط رہنے کی ضرورت ہے۔ عباس عراقچی نے ایک تفصیلی ٹی وی انٹرویو میں کہا کہ ایران ہر اُس منصوبے یا اقدام کی حمایت کرتا ہے جو فلسطینی عوام کے خلاف جرائم اور نسل کشی کے خاتمے کا باعث بنے، مگر اسرائیلی ریاست پر کسی قسم کا اعتماد نہیں کیا جا سکتا کیونکہ اس نے بارہا جنگ بندی معاہدوں کی خلاف ورزی کی ہے۔ انہوں نے واضح کیا کہ فلسطینی گروہوں نے جنگ بندی منصوبے کے صرف پہلے مرحلے سے اتفاق کیا ہے، جب کہ بعد کے مراحل زیادہ نازک اور پیچیدہ ہوں گے۔ عراقچی نے خبردار کیا کہ امریکا اور اسرائیل دونوں کی جانب سے معاہدے کی خلاف ورزی کے امکانات موجود ہیں۔ عباس عراقچی نے نام نہاد ابراہیم معاہدوں کو غداری قرار دیتے ہوئے کہا کہ ایران کسی ایسے منصوبے کا حصہ نہیں بنے گا جو ایک قابض اور نسل کش ریاست کو تسلیم کرنے کا راستہ ہموار کرے۔