Raza Musani 
ممبئی: ہندوستان میں مسلم دشمنی کا بدترین واقعہ پیش آیا ہے۔ مہاراشٹر میں پولیس اہلکار نے چلتی ٹرین میں تین باریش مسلمانوں کو گولیاں مارکر قتل کردیا۔ ہندوستان میں درندگی کا یہ واقعہ مہاراشٹر کے پالگھر ریلوے اسٹیشن کے قریب جے پور ایکسپریس میں پیش آیا۔ ریلوے پروٹیکشن فورس کے اہلکار چیتن شرما نے پہلے کوچ نمبر پانچ میں سینئر افسر ٹیکارام مینا کو گولی مار کر ہلاک کیا۔ پھراسی ڈبے میں مسافر عبدالقادر کو گولی ماردی۔ قاتل پھر پینٹری کار میں پہنچا اور یہاں محمد حسین نامی مسافر جبکہ دو کوچز کے بعد اصغر عباس شیخ نامی تیسرے مسلمان مسافر کو قتل کردیا۔ چیتن شرما نے اصغر کی لاش پر کھڑے ہوکر اپنی ویڈیو بنوائی اور مسلمانوں کیخلاف نفرت انگیز باتیں کرتے ہوئے کہا کہ ہندوستان میں رہنا ہے تو یوگی اور مودی کو ووٹ دینا ہوگا۔ مسلح قاتل مختلف کوچز میں گھومتا رہا اور چن چن کر باریش مسلمانوں کو نشانہ بنایا۔ اس نے کسی ہندو کو ہاتھ بھی نہ لگایا۔
