Raza Musani 
تہران: ایران کی ایٹمی توانائی کی تنظیم کے سربراہ محمد اسلامی نے کہا ہے کہ مغرب نے ہمیشہ اسلامی جمہوریہ کو سائنسی عروج پر پہنچنے سے روکنے کی کوشش کی اور اس نے ایٹمی ایندھن پیدا کرنے والے ملک میں تبدیل ہونے سے روکنے میں کوئی کسر نہیں چھوڑی ۔
تعلیمی شعبے کے ڈائریکٹرز سے خطاب میں محمد اسلامی نے کہا کہ ہر ایک کو معلوم ہونا چاہیے کہ جوہری ایندھن کا سائیکل ایک طاقت پیدا کرنے والا ہےاور اس کا بم بنانے سے کوئی تعلق نہیں ہے۔وہ ایران کے خلاف جھوٹے الزامات لگاتے ہیں اور غلط طور پر ہم پر جوہری بم بنانے کی کوششوں کا الزام لگاتے ہیں کیونکہ وہ نہیں چاہتے کہ ہم جوہری ٹیکنالوجی حاصل کریں۔انہوں نےکہا کہ حالیہ برسوں میں بھاری پانی کی پیداوار کی شدید مخالفت کے باوجود، ہم ایٹمی صنعت اور مالیکیولر سیکٹر دونوں میں اپنی متعلقہ مہارت کو بڑھانے میں کامیاب رہے ہیں۔ نیوکلیئر ٹیکنالوجی ایک منافع بخش کاروبار ہے اور اسے مختلف شعبوں میں استعمال کیا جا سکتا ہے۔ اس کو ملک کی طاقت کو ترقی دینے کے لیے استعمال کیا جا سکتا ہے۔
