Raza Musani 
تہران میں 36 ویں عالمی وحدت اسلامی کانفرنس کی افتتاحی تقریب سے خطاب کرتے ہوئے ایرانی صدر آیت ابراہیم رئیسی نے کہا کہ آج مسلمانوں میں بہت سے مشترکات پائے جاتے ہیں، یہ مشترکات دین کے نام سے موسوم ایک عظیم اور تہذیبی طاقت پیدا کرسکتے ہیں اور آج کی دنیا کی تمام تہذیبوں کے سامنے سر اٹھا کر اعلان کرسکتے ہیں کہ ان کے پاس معاصر انسان کے طرز زندگی کے لئے ایک ماڈل ہے۔
انہوں نے کہا کہ ہمارے رہبر آیت اللہ سید علی خامنہ ای اس حکمت عملی پر ہمیشہ تاکید کرتے ہیں کہ آج عالم اسلام کا اتحاد ایک ناگزیر ضرورت ہے۔ اس نگاہ کا نصب العین یہ ہے کہ جو کوئی بھی قلم، بیان، عمل اور ترک عمل کے ذریعے اتحاد و وحدت کے راستے پر عمل کرے اس نے مدد کی ہے جبکہ جو تفرقہ پیدا کرے تو وہ بلاشبہ دشمن کی حکمت عملی کے راستے پر چل رہا ہے۔
انہوں نے کہا کہ آج علما کی اہم ذمہ داری یہ ہے کہ بصیرت و معرفت کو پھیلائیں۔ آج ہم سب کی ذمہ داری ہے کہ اسلام کے مقام و عظمت اور دشمن کی ناتوانی کے متعلق آگاہی و شعور پھیلائیں۔
ایرانی صدر نےکہا ہے کہ فلسطین کی نجات کی واحد راہ استقامت ہے۔ اس وقت عالم اسلام اپنی بے پناہ طاقت و قوت کے بدولت دشمنوں کا بھرپور مقابلہ کرسکتا ہے فلسطین اور بیت المقدس کو عالم اسلام کا سب سے بڑا اور اہم مسئلہ قرار دیا۔ انہوں نے غاصب صیہونی حکومت کے ساتھ تعلقات کے لئے بعض مسلم ملکوں کے اقدام پر کڑی تنقید کرتے ہوئے کہا کہ حکومتوں کے درمیان رابطہ قوموں کے درمیان رابطے سے بالکل الگ ہے اور علاقے کی کوئی بھی قوم غاصب صیہونیوں کے ساتھ تعلقات کے حق میں نہیں ہو سکتی۔ صدر سید ابراہیم رئیسی نے کہا کہ امریکا اور اسرائیل دیگر ملکوں پر اپنے ارادے مسلط کرنے، ہتھاروں کی منڈیوں کو رونق بخشنے، دیگر ملکوں کے مفادات پر ڈاکہ ڈالنے اور فلسطین اور بیت المقدس کے مسئلے کو کنارے لگانے کی کوشش کرتے رہے ہیں انہوں نے کہا کہ اسلامی جمہوریہ ایران ظلم، دہشت گردی اور تکفیری عزائم کے بالکل خلاف ہے اور امریکہ بھی کہتا ہے کہ وہ دہشت گردی کے خلاف ہے مگر کون ہے اس دنیا میں جو اس بات کو نہیں جانتا کہ دہشت گردی کے خلاف اہم ترین ہیرو کی حیثیت سے ایران کی سپاہ قدس کے کمانڈر شہید جنرل قاسم سلیمانی اور عراق کی عوامی رضاکار فورس الحشد الشعبی کے ڈپٹی کمانڈر شہید ابو مہدی المہندس کے نام ہی تسلیم کئے جاتے ہیں جنھوں نے علاقے کو داعش دہشت گرد گروہ کے وجود سے پاک کیا۔
