امریکا نے یوکرین میں اپنی افواج کی تعیناتی کو مسترد کردیا

واشنگٹن : امریکا نے سیکورٹی ضمانت کے طور پر اپنی زمینی افواج کی یوکرین میں تعیناتی کو مسترد کردیا۔ وائٹ ہاؤس کی ترجمان کیرولین لیویٹ نے نیوز بریفنگ میں کہا کہ سکیورٹی ضمانت کے طور پر یوکرین کو فضائی مدد کی فراہمی زیر غور ہے۔ امریکا رابطہ کاری میں مدد اور یورپی اتحادیوں کو سیکورٹی کی ضمانت کے دیگر ذرائع فراہم کرسکتا ہے۔
ترجمان نے کہا کہ صدر ڈونلڈ ٹرمپ نے اپنی قومی سلامتی ٹیم کو حفاظتی ضمانتوں کے ذریعے دیرپا امن کے لیے قابل قبول فریم ورک تیار کرنے کی ہدایت کی ہے۔ لیویٹ نے کہا کہ صدر سمجھتے ہیں کہ سلامتی کی ضمانتیں دیرپا امن کو یقینی بنانے کے لیے انتہائی اہم ہیں۔ لیویٹ نے مزید کہا کہ ٹرمپ نے یورپی اتحادیوں کے ساتھ ہم آہنگی اور یوکرین اور روس کے ساتھ بات چیت جاری رکھنے کا حکم دیا۔