اسرائیلی فوج کا ایک بار پھر شام کے شہر حمص پر میزائل حملہ

دمشق: اسرائیلی فوج نے ایک بار پھر شام کے شہر حمص پر میزائلوں سے حملہ کردیا۔ اسرائیل سے داغے گئے میزائل لبنان کے دارالحکومت بیروت کے کچھ حصوں پر سےحمص کے آس پاس کے مقامات پر گرے۔ جس کے نتیجے میں املاک کو نقصان ہوا۔ میزائل حملوں میں کسی قسم کا جانی نقصان رپورٹ نہیں ہوا۔ شامی حکام کے مطابق فضائی دفاعی نظام نے وسطی حصوں میں اسرائیلی میزائل حملے کو روکا اور زیادہ تر میزائلوں کو مار گرایا ہے۔ جبکہ اسرائیلی فوج کے ترجمان نے شام کی ایئر ڈیفنس بیٹری کو نشانہ بنانے کا دعویٰ کیا ہے جس کے ذریعے اسرائیل کی جانب طیارہ شکن میزائل داغا گیا تھا۔ حالیہ چند ماہ میں اسرائیل کی جانب سے شام کے ہوائی اور فوجی اڈوں پر حملوں کے واقعات میں تیزی آئی ہے تاکہ ایران کی جانب سے فضائی سپلائی لائنوں کے بڑھتے ہوئے استعمال کو روکا جا سکے جس کے ذریعے وہ شام اور لبنان میں اتحادیوں بشمول لبنان کی حزب اللہ کو ہتھیار پہنچاتا ہے۔