اسلحے کا مسئلہ براہِ راست مستقبل کی فلسطینی ریاست سے جڑا ہے، حماس

بیروت :حماس رہنما عبدالجبار سعید کا کہنا ہے کہ حقیقی فلسطینی ریاست کے بغیر کوئی بھی اپنا اسلحہ نہیں رکھے گا۔ اسلحے کا مسئلہ براہِ راست مستقبل کی فلسطینی ریاست سے جڑا ہوا ہے۔ حماس کے سیاسی بیورو کے رکن عبدالجبار سعید نے قدس نیوز سے گفتگو میں کہا کہ تمام فریق اس بات پر متفق ہیں کہ اسرائیلی حکومت نے پہلے مرحلے کی بیشتر ذمہ داریاں پوری نہیں کیں۔ ایسی صورت میں دوسرے مرحلے کی طرف جانے کی منطق کیا ہے۔ عبدالجبار سعید کا کہنا تھا کہ دوسرے مرحلے کے بارے میں ثالثوں کے پاس کوئی واضح حکمتِ عملی موجود نہیں، جبکہ حماس نے اپنے مطالبات پوری وضاحت کے ساتھ سامنے رکھ دیے ہیں۔ انہوں نے کہا کہ حماس اسلحے کے مسئلے پر بات ضرور کرسکتی ہے، لیکن صرف اس دائرے میں جو فلسطینیوں کے حقوق، اختیارات اور قومی فیصلوں کا احترام کرے۔ انہوں نے کہا کہ غزہ کے خاندان شدید موسم میں مناسب خیموں، موبائل شیلٹرز اور ملبہ ہٹانے کے سامان کی عدم دستیابی کے باعث بدترین حالات میں ہیں۔ انہوں نے شکایت کی کہ غزہ میں داخل ہونے والی بیشتر امدادی اشیا تاجروں کے ذریعے آ رہی ہیں، باقاعدہ ریلیف چینلز کے ذریعے نہیں۔