Raza Musani 
تہران: ایران اور سعودی عرب کے سفیروں نے سات سال بعد ریاض اور تہران میں باضابطہ ذمہ داریاں سنبھال لیں۔ سعودی عرب کے سفیر عبداللہ بن سعود العنزی گذشتہ روز تہران پہنچے اور اپنے فرائض منصبی سنبھال لئے۔ سعودی خبر رساں ادارے ایس پی اے کے مطابق سعودی سفیر نے کہا کہ سعودی قیادت کی ہدایات پر ایران سے ملاقاتیں اور رابطے تیز کرنے اور تعلقات مضبوط بنانے کی اہمیت پر زور دیا گیا ہے۔ انہوں نے کہاکہ سعودی قیادت چاہتی ہے کہ دونوں پڑوسی ممالک کے تعلقات عروج کی نئی منزلوں تک پہنچیں۔ اس سے قبل ایرانی سفیر علی رضا عنایتی نئی سفارتی ٹیم کے ہمراہ سعودی دارالحکومت ریاض پہنچے۔ سفارت خانے میں سعودی وزارت خارجہ کے حکام اور ان کے ساتھیوں نے استقبال کیا۔ وہ دونوں ممالک کے درمیان سفارتی تعلقات کی بحالی کے بعد اہم سفارتی ذمہ داریاں انجام دیں گے۔
