شامی صدر بشار الاسد مستقبل قریب میں چین کا دورہ کریں گے

دمشق: شامی صدر بشار الاسد ملک کے اعلیٰ سطحی وفد کے ہمراہ مستقبل قریب میں چین کا دورہ کریں گے۔ سفارتی ذرائع نے الاخبار کو بتایا کہ اس حوالے سے ایک اعلیٰ شامی وفد جلد چین کا دورہ کرکے چینی حکام کے ساتھ مذاکرات کرے گا۔شامی میڈیا کے مطابق یہ دورہ انتہائی اہمیت کا حامل ہے جس میں بشار الاسد چینی صدر شی چن پنگ کے ساتھ اہم امور پر تبادلہ خیال کریں گے۔ رواں سال کے اوائل میں چین کی ثالثی میں ایران اور سعودی عرب کے درمیان تعلقات کی بحالی کے بعد چین کے خطے میں اثرات میں اضافہ ہوا ہے۔ امریکہ کی جانب سے شام کو سفارتی گوشہ نشینی پر مجبور کرنے کی کوششوں کے باوجود چین نے شامی حکومت کی مدد کرتے ہوئے بین الاقوامی طور پر ابھرنے اور شام اور عرب ممالک کے درمیان دوستی قائم کرنے پر تاکید کی ہے۔