Raza Musani 
باجوڑ: خیبرپختونخوا میں جمیعت علمائے اسلام کے ورکرز کنونشن میں خودکش حملے سے جاں بحق افراد کی تعداد 44 ہوگئی۔ خیبرپختونخوا کے ضلع باجوڑ میں میں جمیعت علما اسلام کا ورکرز کنونشن جاری تھا کہ خوفناک دھماکے سے افراتفری مچ گئی۔ دھماکا اتنا زوردار تھا کہ اس کی آوازدور دورتک سنی گئی۔ دھماکے سے بیس افراد موقع پر جبکہ دیگر اسپتال میں زندگی کی بازی ہارگئے۔ سو سے زائد زخمیوں میں 20 کی حالت تشویشناک ہے۔ دھماکے میں جمعیت علما اسلام کے کئی مقامی عہدیدار بھی جاں بحق ہوئے ہیں۔ آئی جی نے دھماکا خودکش قرار دیا ہے۔ دھماکے میں دس سے بارہ کلو بارود استعمال کیا گیا۔ جمعیت علمائے اسلام کے سربراہ مولانا فضل الرحمان نے دھماکے پر شدید دکھ اور افسوس کا اظہار کرتے ہوئے واقعے کی انکوائری کا مطالبہ کیا ہے۔ صدر مملکت عارف علوی، وزیر اعظم شہباز شریف، وزیر خارجہ بلاول بھٹو زرداری اور دیگر قومی شخصیات نے دھماکے کی شدید مذمت کرتے ہوئے قیمتی جانی نقصان پر دکھ اور اہل خانہ سے تعزیت کا اظہار کیا ہے.
