سوڈان: دارالحکومت خرطوم میں مارکیٹ پر ڈرون حملے میں 43 افراد ہلاک، 55 زخمی

خرطوم : سوڈان کے دارالحکومت خرطوم میں مارکیٹ پر ڈرون حملے میں 43 افراد ہلاک اور 55 زخمی ہو گئے۔ سوڈان میں پانچ ماہ سے جاری جنگ میں تیزی آگئی۔ فوج اور پیرا ملٹری فورسز نے گذشتہ چند روز میں ایک دوسرے کے ٹھکانوں پر شدید حملے کئے ہیں۔ ڈرونز نے جنوبی خرطوم پر لگاتار حملے کیے اور مختلف اہداف کو نشانہ بنایا۔ خرطوم کی پرہجوم قورو مارکیٹ پر حملوں میں خواتین اور بچوں سمیت 43 افراد ہلاک اور 55 زخمی ہوئے۔کئی زخمیوں کی حالت نازک بتائی جاتی ہے۔ جس سے ہلاکتوں میں اضافے کا خدشہ ہے یہ علاقہ ریپڈ سپورٹ فورس کے قبضے میں ہے اور اس نے حملے کا ذمہ دار سوڈانی فوج کو قرار دیا ہے۔ ملک میں 15 اپریل کو شروع ہونے والی جنگ میں 7,500 افراد ہلاک ہو چکے ہیں۔ اقوام متحدہ کے مطابق مجموعی طور پر 50 لاکھ سے زیادہ لوگ اپنے گھر بار چھوڑنے پر مجبور ہوئے ہیں، جن میں سے 10 لاکھ سرحدوں کے پار ہیں۔