اسپین کا اسرائیل کے مبینہ جنگی جرائم کی تحققیات کا اعلان

میڈرڈ : اسپین کی حکومت نے غزہ میں مبینہ بین الاقوامی قانون کی خلاف ورزیوں کی تحقیقات کا آغاز کر دیا ہے۔ اسپین کے اٹارنی جنرل الوارو گارسیا اورٹیز نے کہاہے کہ انہوں نے ایک ٹیم بنانے کا حکم دیا ہے جو شواہد جمع کرے گی اور انہیں بین الاقوامی عدالت انصاف آئی سی جے اور بین الاقوامی فوجداری عدالت آئی سی سی کے حوالے کرے گی۔
انہوں نے کہا کہ یہ اقدام اقوام متحدہ کے تحقیقاتی کمیشن کی حالیہ رپورٹ کے بعد کیا جا رہا ہے۔ انہوں نے کہا کہ تحقیقات سے اس بات کا تعین کیا جائے گا کہ آیا غزہ میں دو سالہ جنگ کے دوران بین الاقوامی قانون کی سنگین خلاف ورزیاں ہوئی ہیں یا نہیں۔ انہوں نے اقوام متحدہ کے رکن ممالک سے کہا کہ وہ آئی سی سی کے ساتھ شواہد اکٹھا کرنے اور محفوظ کرنے میں تعاون کریں۔