روس کبھی بھی امریکی دباؤ کے آگے نہیں جھکے گا، پیوٹن

ماسکو: روسی صدر ولادیمیر پیوٹن نے دو بڑی روسی آئل کمپنیوں پر امریکی پابندیوں کو غیر دوستانہ اقدام قرار دیتے ہوئے کہا ہے کہ ان سے روسی معیشت پر کوئی خاص اثر نہیں پڑے گا۔ پیوٹن نے کہا کہ پابندیوں سے روس امریکا تعلقات کو کوئی فائدہ نہیں پہنچے گا۔ یہ روس پر دباؤ ڈالنے کی ناکام کوشش ہے۔ انہوں نے روسی صحافیوں سے گفتگو میں کہا کہ کوئی خوددار ملک دباؤ میں آ کر فیصلے نہیں کرتا۔ روس کبھی بھی امریکی دباؤ کے آگے نہیں جھکے گا۔
روسی صدر ولادیمیر پیوٹن نے مزید کہا کہ روسی آئل کمپنیوں پر امریکی پابندیاں یقیناً روس پر یوکرین جنگ کو بند کرنے کے لیے دباؤ ڈالنے کی کوشش ہے لیکن یہ بات یاد رہنی چاہیے کہ کوئی عزت دار ملک اور عزت دار قوم دباؤ میں دباؤ میں آکر فیصلے نہیں کرتے۔انہوں نے خبردار کیا کہ امریکی پابندیوں کے نتیجے میں تیل کی سپلائی میں تیزی سے کمی کے باعث تیل کی قیمتوں میں اضافہ ہو جائے گا اور یہ صورتحال خود امریکا کے لیے بھی مشکلات پیدا کرے گی۔