تعلقات کی بحالی، انڈیا نے کابل میں سفارتخانہ دوبارہ کھول دیا

نئی دہلی : انڈیا نے کابل میں اپنا سفارتخانہ دوبارہ کھول دیا ہے۔ یہ قدم دونوں ملکوں کے درمیان تعلقات میں حالیہ بہتری کی عکاسی کرتا ہے۔ انڈین وزارتِ خارجہ نے ایک بیان میں کہا ہے کہ کابل میں موجود اس کا تکنیکی مشن اب مکمل سفارتخانے کا درجہ اختیار کرچکا ہے۔ یہ فیصلہ افغان وزیرِ خارجہ کے حالیہ دورۂ انڈیا کے دوران کیے گئے اعلانات کے مطابق ہے۔
وزارت کے مطابق یہ فیصلہ انڈیا کے اس عزم کی عکاسی کرتا ہے کہ وہ افغانستان کے ساتھ باہمی دلچسپی کے تمام شعبوں میں دوطرفہ روابط کو مزید مضبوط بنانا چاہتا ہے۔ وزارت کے مطابق سفارتخانہ افغانستان کی جامع ترقی، انسانی ہمدردی کی امداد اور استعداد کار بڑھانے کے منصوبوں میں انڈیا کے کردار کو مزید فروغ دے گا، جو افغان معاشرے کی ترجیحات اور امنگوں کے مطابق ہوگا۔ طالبان کے 2021 میں اقتدار سنبھالنے کے بعد انڈیا نے اپنا سفارتخانہ بند کردیا تھا۔