Raza Musani 
کراچی : یوم القدس پر پاکستان بھر میں احتجاجی ریلیاں نکالی گئیں اور مظاہرے کئے گئے۔ کراچی میں بھی فلسطینیوں سے اظہار یکجہتی کیلئے جمعۃ الوداع کو بطور یوم القدس منایا گیا۔ شہر کے مختلف علاقوں سے چھوٹی بڑی ریلیاں پرانی نمائش چورنگی پہنچیں جہاں سے تمام ریلیاں مرکزی القدس ریلی میں شامل ہوکر تبت سینٹر تک گئیں۔ مرکزی ریلی میں خواتین اور بچوں کی بڑی تعداد نے شرکت کی، شرکاء نے فلسطینی شہدا کی تصاویر اٹھا رکھی تھیں۔
ریلی کے شرکاء سے خطاب کرتے ہوئے مقررین کا کہنا تھا کہ پاکستان کی سر زمین پر کسی میں جرات نہیں کہ اسرائیل کو تسلیم کرے۔ریلی کے شرکاء نے اسرائیل اور امریکہ کے جھنڈے نذر آتش کئے۔
قدس کی آزادی کےلیے ایک اور القدس ریلی ریگل چوک سے کراچی پریس کلب تک بھی نکالی گئی، جس میں شہریوں کی بڑی تعداد نے شرکت کی۔القدس ریلیوں کے شرکا نے فلسطین و حماس سے اظہار یکجہتی اور اسرائیلی بربریت کیخلاف ثابت قدم رہنے کے عہد کی تجدید کی۔
