عراق میں قرآن سوزی پر احتجاج، سوئیڈن کا سفارتخانہ نذر آتش

بغداد : عراق میں سینکڑوں مظاہرین نے قرآن سوزی کیخلاف احتجاج کے دوران سوئیڈن کا سفارتخانہ جلادیا۔ دارالحکومت بغداد میں رات گئے سینکڑوں افراد سویڈش سفارت خانے کے سامنے جمع ہوئے۔ مظاہرین نے سویڈش پولیس کی جانب سے ایک بار پھر قرآن جلانے کا اجازت نامہ جاری کرنے پر احتجاج کیا۔ مظاہرے کے دوران مظاہرین کی بڑی تعداد سفارتخانے میں گھس گئی اور توڑ پھوڑ کے بعد عمارت کو آگ لگا دی۔ درجنوں افراد سفارتخانے کے کمپلیکس کی دیوار پھلانگ کر اندر داخل ہوئے جبکہ سامنے کا دروازہ توڑ دیا۔ احتجاج کی اپیل مقتدیٰ الصدر نے دی تھی۔ عراقی حکومت نے حکام کو ہدایت کی ہے کہ فوری طور پر تحقیقات اور فعل کے مرتکب افراد کی شناخت کریں تاکہ انہیں قانون کے کٹہرے میں لایا جاسکے۔ سوئیڈن کی وزارت خارجہ نے ایک بیان میں حملے کی سخت مذمت کی ہے۔