پاکستان کو امریکا یا چین میں سے ایک کے انتخاب کیلئے نہیں کہا، ترجمان

واشنگٹن: امریکا نے کہا ہے کہ پاکستان سے کبھی بھی امریکا یا چین میں سے کسی ایک کے انتخاب کیلئے نہیں کہا۔ امریکی محکمہ خارجہ کے ترجمان میتھیو ملر نے کہاکہ پاکستان اور آئی ایم ایف کے درمیان اسٹاف لیول معاہدے میں پیشرفت کا خیر مقدم کرتے ہیں۔ تجارت اور سرمایہ کاری کو مضبوط بنانے کے لیے پاکستان کے ساتھ تیکنیکی رابطے جاری رکھیں گے جو دو طرفہ تعلقات کی ترجیحات ہیں۔ انہوں نے کہاکہ پاکستان کو آئندہ بہت محنت کرنا ہوگی تاکہ طویل المدت اقتصادی بحالی اور خوشحالی کی پائیدار راہ پر گامزن رہ سکے۔ اس سلسلے میں پاکستان کے ساتھ کھڑے رہیں گے۔ پاکستان کی اقتصادی کامیابی کے لیے غیر متزلزل حمایت جاری رکھیں گے۔