Raza Musani 
جدہ : نائب وزیراعظم اور وزیر خارجہ اسحاق ڈار نے کہا ہے کہ اسرائیل کا گریٹر اسرائیل منصوبہ خطے میں امن کیلئے خطرہ ہے اور پاکستان گریٹر اسرائیل منصوبے کو سختی سے مسترد کرتا ہے۔
سعودی عرب کے شہر جدہ میں اسلامی تعاون تنظیم کے وزرائے خارجہ اجلاس سے خطاب میں اسحاق ڈار کا کہنا تھا کہ غزہ میں اسرائیلی مظالم بین الاقوامی قوانین کی کھلی خلاف ورزی ہیں،اسرائیل کے ہاتھوں 60 ہزار سے زائد فلسطینی شہید ہوچکے ہیں۔ انہوں نے کہا کہ او آئی سی کا ہنگامی اجلاس بلانے پر ترکیہ اور ایران کے شکر گزار ہیں، فلسطینیوں کو اجتماعی سزا دی جارہی ہے، اسپتالوں ،اسکولوں، پناہ گزین کیمپوں پر حملے عالمی قوانین کے خلاف ہیں۔ ان کا کہنا تھاکہ فلسطین میں قحط کی صورتحال ہے، فوری اقدامات ناگزیر ہیں، عالمی برادری غزہ میں مستقل اور غیر مشروط جنگ بندی کیلئے اقدامات کرے۔
اسحاق ڈار کا کہنا تھاکہ اسرائیل کا گریٹر اسرائیل منصوبہ خطے میں امن کیلئے خطرہ ہے، پاکستان گریٹر اسرائیل منصوبے کو سختی سے مسترد کرتا ہے، پاکستان نے 31 عرب واسلامی ممالک کے مشترکہ بیان کی حمایت کی۔ دو ریاستی حل ہی فلسطین میں پائیدار امن کا واحد راستہ ہے۔ انہوں نے مزید کہا کہ پاکستان نے7 فوری اقدامات تجویز کیے جن میں مستقل جنگ بندی سرفہرست ہے، اقوام متحدہ کی سلامتی کونسل کو اسرائیل کے خلاف سخت اقدامات کرنے چاہئیں۔ ان کا کہنا تھاکہ پاکستان بطور غیر مستقل رکن فلسطین کے حق خودارادیت کیلئے عالمی رائے عامہ کو متحرک کرتا رہے گا۔
