Raza Musani 
کابل: افغان طالبان نے پاکستان کے الزامات مسترد کرتے ہوئے کہا ہے کہ اپنی کوتاہیوں کا الزام افغانستان پر لگانا کسی کے مفاد میں نہیں ہے۔ طالبان ترجمان ذبیح اللہ مجاہد نے پاکستانی آرمی چیف جنرل عاصم منیر کے بیان پر تنقید کی جس میں انہوں نے افغانستان کو خطے میں دہشت گردی کا ذریعہ قرار دیا تھا۔ ذبیح اللہ مجاہد نے کہاکہ ہم نے ہمیشہ کہا ہے کہ افغان سرزمین پاکستان پر حملے کے لیے استعمال نہیں ہوگی۔ پاکستان دہشت گردی میں اضافے کا جواب اپنی سرحدوں کے اندرتلاش کرے۔ انہوں نے سیکیورٹی فورسز اور انٹیلی جنس آپریشنز میں پاکستان کے اخراجات کی طرف اشارہ کیا اور کہا کہ پاکستان کے بجٹ کا بڑا حصہ دہشت گردی کے خلاف جنگ میں خرچ کیا جا رہا ہے۔ جس سے یہ سوال اٹھتا ہے کہ قوم دہشت گردی پر قابو کیوں نہیں پا رہی ہے۔ ذبیح اللہ مجاہد نے نشاندہی کی کہ افغانستان میں آپریشن کے دوران داعش کے 18 دہشت گرد مارے گئے تھے ان کا تعلق پاکستان سے تھا۔ ہم نے کسی کی طرف انگلی نہیں اٹھائی اور اپنے ہی ملک کو محفوظ بنانے میں لگے رہے۔
