پاکستان کو طالبان کے ساتھ حقیقت پسندانہ رویہ اپنانے کی ضرورت ہے، شاہ محمود قریشی

اسلام آباد : وزیر خارجہ شاہ محمود قریشی کا کہنا ہے کہ پاکستان کو طالبان کے ساتھ مل کر رہنے کیلئے حقیقت پسندانہ رویہ اپنانے کی ضرورت ہے، پاکستان کے دو روزہ دورے کے دوران برطانوی وزیر خارجہ ڈومینک راب کے ساتھ اسلام آباد میں نیوز کانفرنس کے دوران طالبان کے ساتھ پاکستان کے تعلقات سے متعلق سوال پر شاہ محمود قریشی نے کہا کہ کسی بھی شرائط کا تعین کرنے سے پہلے دستیاب آپشنز پر غور کرنا چاہیے، کسی کے پاس آپشن ہے کہ اٹھے اور چل دے تاہم ہم ایسا نہیں کرسکتے، ہم پڑوسی ہیں اور ہمیں ایک ساتھ رہنا ہے، جغرافیہ ہمیں ایک دوسرے کے ساتھ جوڑتا ہے لہذا ہمارا نقطہ نظر کچھ مختلف اور حقیقت پسندانہ ہونا چاہیے، انہوں نے کہا کہ برطانوی وزیر خارجہ سے باہمی تعلقات اور افغانستان پر بات ہوئی، اسٹریٹجک بات چیت کے لیے ہم نے نیا پلیٹ فارم تشکیل دیا ہے، ملاقات میں فنانشل ایکشن ٹاسک فورس (فیٹف) کے گرے لسٹ کے حوالے سے بھی برطانوی وزیر خارجہ سے بات چیت ہوئی ہے، ہم نے گرے لسٹ سے نکلنے کے لیے اقدامات کیے ہیں۔