پاکستان افغانستان پر انگلی اٹھاکر اپنے مسائل حل نہیں کرسکتا، طالبان

کابل : افغانستان میں دہشت گرد گروہوں کی سرگرمیوں کے بارے میں پاکستانی وزیراعظم شہباز شریف کے بیان پر ردعمل کا اظہار کرتے ہوئے طالبان انتظامیہ نے اسے غیر ذمہ دارانہ قرار دیا ہے۔ قطر میں طالبان کے سیاسی دفتر کے ترجمان نعیم وردک نے ٹوئٹ کیا ہے کہ افغانستان کے بارے میں پاکستان کے وزیراعظم شہباز شریف کا غیر ذمہ دارانہ بیان ان کی عدم آگاہی اور سفارتی اصول سے ان کی ناواقفیت اور اسی طرح ان کی گھبراہٹ و پریشانی کا آئینہ دار ہے۔ پاکستان کے وزیراعظم شہباز شریف یقیناً اپنے ملک کی اقتصادی مشکلات پر قابو پانے کی ہرممکن کوشش کریں گے مگر یہ جان لینا چاہئے کہ افغانستان پر انگلی اٹھانے سے کوئی مسئلہ حل نہیں ہو گا۔