پاکستان اور ایران کا اسلاموفوبیا کا مقابلہ کرنے کیلئے مل کر کام کرنے کا عزم

اسلام آباد: وزیر خارجہ بلاول بھٹو زرداری نے ایرانی ہم منصب حسین امیر عبدالہیان سے ٹیلی فونک گفتگو کی اور مشترکہ طور پر سوئیڈن میں قرآن پاک کی بےحرمتی کے گھناؤنے فعل کی مذمت کی۔ بلاول بھٹو نے کہا کہ ایسے اسلاموفوبک واقعات مذہبی عدم برداشت، نفرت اور اشتعال انگیزی کو ہوا دیتے ہیں۔ان کا کہنا تھا کہ اس قسم کے واقعات کو کسی بھی بہانے جائز قرار نہیں دیا جاسکتا۔ وزیر خارجہ نے کہا کہ پاکستان اور ایران نے اسلاموفوبیا کا مقابلہ کرنے اور دیگر او آئی سی ملکوں سے مل کر کام کرنے کے عزم کا اعادہ کیا ہے۔انہوں نے مزید کہا کہ ہم نے دو طرفہ دلچسپی کے دیگر شعبوں پر بھی تبادلہ خیال کیا۔