پاک چین وزرائے اعظم کی ملاقات میں جوائنٹ ایکشن پلان پر اتفاق

بیجنگ : بیجنگ میں وزیراعظم شہبازشریف کی چینی ہم منصب سے ملاقات کے بعد جاری اعلامیہ کے مطابق چین اور پاکستان دہشت گردی کے خاتمے کے لیے مل کر کام کریں گے۔ چین انسداد دہشت گردی کی صلاحیتوں کو بڑھانے کے لیے پاکستان کی مدد کرے گا، پاکستان اور چین مل کر پاکستان میں چینی اہلکاروں، منصوبوں اور اداروں کی حفاظت کو یقینی بنائیں گے۔
اعلامیے کے مطابق پانچ نئے کوریڈورز سمیت سی پیک ٹو تیز کرنے پر بھی اتفاق کیا گیا۔ گوادر پورٹ جلد آپریشنل کرنے پر بھی زور دیا گیا۔ قراقرم ہائی وے اور ریلوے پروجیکٹ مین لائن ون کی ری الائنمنٹ پر بھی اتفاق ہوا۔ وزیراعظم شہباز شریف نےکہا کہ چین کے ترقیاتی ماڈل سے سیکھنا چاہتے ہیں، صدر شی جن پنگ کے عالمی اقدامات کی بھرپور حمایت کرتے ہیں، جوائنٹ ایکشن پلان پر دستخط اہم سنگ میل ہے۔
بیجنگ میں سرمایہ کاری کانفرنس سے خطاب میں وزیراعظم کا کہنا تھا کہ چین نے ہر مشکل وقت میں پاکستان کا ساتھ دیا ہے، سی پیک کی بدولت پاکستان میں زراعت اور صنعت بحال ہوئی، چین کے تعاون سے ہم نے بجلی کے بحران پر قابو پایا، آج ہم سی پیک ٹو لانچ کرنے کے لیے تیار ہیں۔ وزیراعظم شہباز شریف نے زراعت کے شعبے میں چینی سرمایہ کاروں کو پاکستان میں سرمایہ کاری کرنے کی دعوت بھی دی۔