او آئی سی کا غزہ میں اسرائیلی جارحیت بند کرانے کا مطالبہ

جدہ : اسلامی تعاون تنظیم نے عالمی فریقوں سے غزہ میں اسرائیلی جارحیت بند کرانے کا مطالبہ کر دیا۔ او آئی سی کے سیکریٹری جنرل حسین ابراہیم طہٰ نے سلامتی کونسل کے مستقل رکن ممالک، اقوام متحدہ کے سیکریٹری جنرل، یورپی یونین میں خارجہ پالیسی کے سربراہ۔ ریڈ کراس کے سربراہ اور انسانی حقوق کمیشن کے ہائی کمشنر کوخطوط لکھ دیے۔ حسین ابراہیم طحہٰ نے فوری جنگ بندی اور فلسطینی عوام کے لیے عالمی تحفظ اور فوری امدادی مہم چلانے پر زور دیا ہے۔ اسلامی تعاون تنظیم کا کہنا ہے کہ اسرائیل رہائشی عمارتوں اور بنیادی ڈھانچے پر دانستہ حملے کر رہا ہے۔ لاکھوں فلسطینیوں کی جبری بے دخلی کی جا رہی ہے۔ یہ سب بین الاقوامی قانون اور بین الاقوامی انسانی قانون کی کھلی خلاف ورزی ہے۔ علاوہ ازیں او آئی سی جنرل سیکریٹریٹ نے ایک اور بیان میں کہا کہ ’غزہ میں سینکڑوں رہائشی عمارتیں اور بنیادی ڈھانچہ تباہ ہو چکا ہے۔ پانی و بجلی منقطع ہے۔ ایندھن اور دوائیں ختم ہو چکی ہیں۔ لاکھوں فلسطینی نقل مکانی پر مجبور ہیں۔ او آئی سی جنرل سیکریٹریٹ نے اس غیرمعمولی انسانی المیے کے دوران فلسطینی عوام کی مدد کے لیے ادویہ، خوراک، بنیادی ضرورت کا سامان فراہم کرنے والے رکن ملکوں کے کردار کی تعریف کی۔