Raza Musani 
غزہ : حماس نے امریکی صدر ڈونلڈ ٹرمپ کو خط بھیجا ہے جس میں ساٹھ روزہ جنگ بندی کی ضمانت کے بدلے آدھے یرغمالیوں کی رہائی کی پیشکش کی ہے۔ امریکی چینل فاکس نیوز کے مطابق حماس نے یہ خط قطری ثالثوں کے حوالے کیا ہے جسے اسی ہفتے امریکی صدر ٹرمپ کے حوالے کیا جائے گا۔ خط میں حماس نے ساٹھ دن کے لیے مکمل جنگ بندی کی تجویز دی ہے بشرطیکہ ٹرمپ اس کی ضمانت دیں۔ اس کے بدلے میں حماس آدھے یرغمالیوں کو رہا کردے گی۔ تاہم ٹرمپ نے حالیہ بیانات میں کہا ہے کہ ان کا مطالبہ تمام یرغمالیوں کی فوری رہائی ہے۔
ادھر سعودی نیوز گروپ العربیہ کے مطابق جنگ بندی کیلئے ایک نئی تجویز پیش کی گئی ہے جس میں دس اسرائیلی یرغمالیوں کی رہائی اور دو امریکی یرغمالیوں کی لاشیں حوالے کرنے اور امریکی ضمانت کی فراہمی کے بدلے میں غزہ میں دو ماہ کے لیے جنگ بندی اور انسانی امداد کے داخلے کی اجازت دینے کا مطالبہ کیا گیا ہے۔
