خیبر پختونخوا میں کسی صورت آپریشن کی اجازت نہیں دیں گے، علی امین گنڈاپور

پشاور : وزیراعلیٰ خیبر پختون خوا علی امین گنڈا پور نے کہاہے کہ دہشت گردی کنٹرول کرنے کے لیے افغانستان کے ساتھ بات چیت ضروری ہے۔ انہوں نے کہا کہ ہمارا افغانستان کے ساتھ طویل بارڈر ہے، روس نے افغانستان پر حملہ کیا توکہا گیا یہ جہاد ہے، پاکستان کے بہت سے لوگوں نے وہاں جہاد میں حصہ لیا امریکا نے حملہ کیا تو ہماری پالیسی بدل گئی تھی، ہم اپنے ہوائی اڈے امریکا کو دے رہے تھے۔ انہوں نے کہا کہ اپنی سرزمین استعمال ہونے دینا ہماری غلطی تھی، اس کے بعد ہمارا افغانستان سے تعلق خراب ہوا۔ وزیراعلیٰ خیبرپختونخوا کا کہنا تھا کہ گڈ سے بیڈ ہونے والے طالبان بنوں کینٹ پر حملے کے پیچھے تھے، دہشت گردی کو کنٹرول کرنے کے لیے افغانستان کے ساتھ بات چیت کرنا ضروری ہے جبکہ وفاقی حکومت کی ساری توجہ پی ٹی آئی کو دبانے پرہے۔ خیبر پختونخوا میں کسی صورت آپریشن کی اجازت نہیں دیں گے، آپریشن کا فائدہ نہیں،نقصان ہی ہونا ہے۔