غزہ کیلئے امداد پر نئی پابندیاں، رفح کراسنگ کھولنے سے انکار

غزہ : اسرائیل نے جنگ بندی کے باوجود غزہ کیلئے امداد پر نئی پابندیاں عائد کر دیں اور رفح کراسنگ کو بھی بند رکھا ہے جسے آج کھولے جانے کا امکان ہے۔ جنگ بندی کے باوجود غزہ میں وافر مقدار میں امداد داخل نہیں ہوسکی۔
اسرائیل نے امدادی ٹرکوں کی تعداد کو تین سو تک محدود کردیا ہے۔ ہزاروں ٹرک انسانی امداد کے انتظار میں سرحد پر پھنسے ہوئے ہیں۔ اقوام متحدہ کی ایجنسی انروا نے تصدیق کی ہے کہ اسرائیل غزہ میں امداد داخل ہونے سے روک رہا ہے۔ وافر مقدار میں خوراک، صفائی کی کٹس، ادویات اور عارضی خیموں کے لیے ضروری سامان غزہ کے باہر گوداموں میں موجود ہے، جنہیں اسرائیلی ریاست نے اندر آنے سے روک رکھا ہے۔ بیان میں کہاگیا ہےکہ ہمیں فوری اجازت کی ضرورت ہے تاکہ امدادی اشیا غزہ لانا شروع کی جائیں۔