Raza Musani 
تل ابیب : صیہونی وزیراعظم نیتن یاہو نے قطر پر ایک بار پھر حملے کی کھلی دھمکی دیدی۔ صیہونی وزیراعظم نیتن یاہو نے ایک بیان میں کہا کہ اگر قطر نے حماس رہنماؤں کو بیدخل نہ کیا تو وہ دوبارہ انہیں قتل کرنے کی کوشش کریں گے۔ انہوں نے کہا کہ میں قطر اور ان تمام اقوام سے کہتا ہوں جو دہشت گردوں کو پناہ دیتے ہیں۔ آپ یا تو انہیں ملک سے نکال دیں یا آپ انہیں انصاف کے کٹہرے میں لائیں کیونکہ اگر آپ ایسا نہیں کرتے تو ہم کریں گے۔ نتین یاہو نے کہا کہ گیارہ ستمبر کے بعد امریکہ نے کیا کیا؟ اس نے ان دہشت گردوں کو پکڑنے کا وعدہ کیا جنہوں نے یہ گھناؤنا جرم کیا، وہ جہاں بھی ہوں گے۔ اور اس نے دو ہفتے بعد اقوام متحدہ کی سلامتی کونسل میں ایک قرارداد بھی منظور کی۔
نیتن یاہو نے کہا کہ ہم نے بھی انہی خطوط پر کام کیا۔ ہم نے دہشت گردی کے ماسٹر مائنڈز کا پیچھا کیا جنہوں نے 7 اکتوبر کو قتل عام کیا اور ہم نے قطر میں ایسا کیا جو دہشت گردوں کو پناہ اور محفوظ پناہ گاہیں دیتا ہے۔ وہ حماس کو مالی امداد دیتا ہے۔ ہم نے بالکل وہی کیا جو امریکہ نے افغانستان میں القاعدہ کے دہشت گردوں کے پیچھے جانے اور پاکستان میں اسامہ بن لادن کو مارنے کے بعد کیا تھا.
